2 IONI

Ioni yana kiluma 'ana veluga.

De'e letanina 'waineye, Ioni kebu i da vo, Yau Ioni 'waikuyega,” 'asa'aiana i vo, 'Auvea tovetumaganavo 'adi To'edakumeta 'waikuyega.” I kilumaga tamu vavine ma natudiavo 'waidie. Wata yana leta 'ana 'eba ve'a'ava 'waineye tamu vavine Ioni taiadi i miamiaga faifaidi i vona. To'aseta i vonaga, kebu vevine mogitana faifaidi i da vonavona, we'e mogitana voke Ioni i awatabai tovetumagana 'aila'a 'ailuga faifaidi. Ioni i veifufu tamu Iesu yana 'aila'a 'waidie bega ma ediavo i na vevenuakalikali wata i matakia 'waidie tove-vekavekali faifaidi. De'e letanina 'ana 'idi side bani'odi.

Vona-vekaiwa. 1:1-3

Venuakalikali. 1:4-6

Matakia tove-vekavekali faifaidi. 1:7-11

'Alanuai. 1:12-13

2 John

1 Yau 'auvea, yami to'edakumeta, a vekaiwa 'omi vavine vevenua'ivinimi ma natumiavo ^{▼▼Voke 'ana 'aseta Ioni i kilukiluma tamu Keliso yana 'Aila'a 'waidie.} 'waimie. Basenadi Yaubada i venua'ivinemi 'wa vetumagana 'waineye, bega a nuakalikaliemi mogitana. Yau kebu 'aiseku a da nuakalikaliemiga, siwe wata tomotoga matatabudi Yaubada yana nuanua tonovidi i 'asetadiga, i nuakalikaliemi. 2 Tomotoganidi taiadi matatabuma 'a nuakalikaliemi fai Yaubada yana nuanua tonovidi tutuya matatabuna i 'eno'eno 'waimeye kebu i na 'a'ava.

3 A vevelu'ui, nuanuaku Tamada Yaubada wata Natuna Iesu Keliso ma yadi nuakalikali i na vevesauluva 'atumaina 'waideye, i na 'i'isanuakalikalieda wata nuanua bikadi mia 'atumaina taiadi i na veleveleda. De'e naninidi 'waidiega matatabuda ta na veveiana, wata Yaubada yana nuanua tonovidi bani'odi ta na vesauluva.

Venuakalikali mogitana kebu vekali.

4 Natumiavo 'ifwaidi faifaidi a sosoana bwaikina fai a 'isedi Yaubada yana nuanua tonovidi i vevematayakeyakedi ava'ai Tamada i voneyeniga 'waideye bani'odi. 5 Bega 'omi a nuakalikaliemiga a vonevonemi, nuanuaku ma edavo ta na vevenuakalikali. De'e veimeanina nuakalikali faifaina kebu veimea 'ivaunaga, basenadi 'eba velamuyega i 'eno'eno 'waideye. 6 Nuakalikalinina faifaina a vonavonaga side bani'odi. Ta na vevenuakalikaliga mogitana, Yaubada yana veimea ta vevematayakeyakedi. Yana veimeanina bwaikina basenadi 'wa 'asetai i vo, I lubwainemi 'aitamogana 'aitamogana 'wa na vevenuakalikali.”

7 Nuanuaku 'wa na vevenuakalikali fai 'awalawa fuedi 'waidie tovekali i miamiani. Tomotoganidi yadi nuanua igodi i vo, Iesu Keliso kebu i da vetomotogaotoga 'ida bani'odi.” Tovekalinidi Keliso 'ana gaviavo, nuanuadi i na vekalieda. 8 Taunimi 'wa na 'i'isave'avinimi bega kebu i na vekaliemi. 'Ai'edi bonadi 'wa na vetumaganediga, yami folova Yaubada faifaina 'ana tutula kebu 'wa na 'ewai 'wainega. Nuanuaku 'ama tutula matatabuna 'wa na veluagai. 9 Egavo Keliso yana ve i na 'iaweni i na damana tovekalinidi 'waidie, tomotoganidi kebu i da miave'itubama Yaubada taiadi. We'e egavo Keliso yana ve 'waideye, 'waineamo i na nunagoi, taunidi i miave'itubama Tamada wata Natuna taiadi. 10 'Ai'edi aitoi i na wai 'waimie nuanuana i na ve 'waimie, siwe yana venina kebu Keliso yana vona bani'odiga, kebu 'wa na voneni i na wai yami vanuge, wata kebu tamu sai'afo 'wa na tolivileni. 11 We'e 'ai'edi aitoi i na lu'uma'umaieniga, siwe 'asa'aiana 'akonadi 'ana 'au yana folova sakoina 'waineye.

S10 Mad 10:13-14 Lom 16:17S11 1 Tim 5:22

Yana vona 'ana 'eba ve'a'ava.

12 Nuanuaku 'waimie a na veifufu manamanawena, siwe kebu kiluma 'aisena 'wainega. A nuani tauniotogiku a na waimo a na veifufu 'waimie bega matatabuda ta na sosoana 'aitamogana.

13 Taimi natudiavo ^{▼▼Voke 'ana 'aseta Keliso yana 'Aila'a tamu, Ioni taiadi i miamia.} de'e bei i miamianiga, yadi vekaiwa i vetunei 'waimie. Taiminidi, wata Yaubada i venua'ivinedi.

'Asa'aiana bani'odi,

Yau Ioni.